FAMYR: Esti 8 setiembre y tolos díes #AsturiesNunTienRei
Otra vegada más la monarquía impuesta pol franquismu torna a Asturies a tratar de llexitimase pisoteando la soberanía popular. Esti añu la “Casa de Borbón” pretende vendenos la entronización de Leonor como dueña y señora d’Asturies. Aprovechando la cellebración del 8 de setiembre —día en que diz la fábula católica la “santina” guió a les tropes de Don Pelayo pa echar a los “moros”— los borbones pretenden perpetuar el mitu del cuadonguismu y fundise cola estirpe de Pelayu. Pa cellebrar esta pantomima, el llugar escoyíu va ser l`oriente d’Asturies y más concretamente Cuadonga, “cuna d’España” según el relatu nacional-católicu que nos impusieron durante 40 años y pervive gracies a instituciones antidemocrátiques como la monarquía.
El 21 d’Ochobre de 1937 les tropes franquistes invadieron toa Asturies poniendo fin a la llegalidá republicana de factu. Dende esi momento impusieron un réximen totalitariu basáu nel terror y el control social que n’Asturies cobrose abondes víctimes: miles de persones executaes, encarcelaes, perseguíes y apaleaes. Pero Asturies siempre foi exemplu de resistencia, durante tola dictadura mantuvimos n’altu la bandera de la llucha obrera y democrática plantando cara al réxime pesie a la brutal represión. Cola muerte de Franco “la monarquía del 18 de julio” camudose en parlamentaria y la causa republicana foi arrequexada polos partios que años enantes decíen defendela. Dende entonces la monaquía vivió cómodamente a la solombra del poder, enriqueciéndose a base de corrupteles y despilfarros. Mientres tantu a les clases populares toconos pagar los platos rotos; crisis, paru, precaridá y emigración.
Esti 8 setiembre l’Asturies antifacista y republicana tien el deber de plantar cara a la ofensiva monárquica. Dende la Federación Asturiana Memoria y República (FAMYR) llamamos a sumase a la iniciativa unitaria #AsturiesNunTienRei y a facer una marcha de protesta dende les Arriondes pa mostrar el nuesu refugu a la continuación del “princesado” en nome de Leonor de Borbón.
Federación Asturiana Memoria y República (FAMYR)
¡ASTURIES NUN TIEN REI! ¡PUXA LA REPÚBLICA!
