Un ataque facista estroza’l monolitu qu’homenaxeaba a los milicianos d’El Mazucu

Dende la Federación Asturiana Memoria y República vienen de denunciar públicamente l’ataque sufríu pol monolitu asitiáu nel Altu la Tornería de Llanes, n’alcordanza y homenaxe de los milicianos asturianos que llucharon nel Mazucu durante de la Guerra Civil. La llápida que recordaba a los lluchadores antifacistes foi arrancada de cuayu, demientres que la piedra que caltenía dicha llápida cunta agora con una pintada de calter facista.

Dende FAMYR señalen tamién que «nun ye la primer vegada que los facistes atenten escontra monumentos qu’homenaxeen a los lluchadores antifacistes nel oriente asturianu», sufriendo tamién ataques la llápida asitiada en Pandiello (Cabrales). Denuncien amás que nel mesmu Mazucu esiste dende va 70 años un monolitu que fae alcordanza de la Lexón Cóndor, compuesta por fuercies de l’alemaña nazi. Esto constitúi «ún de los cabero monumentos nazis que queden n’Europa», sentencien dende FAMYR.

Pa finar, informen de que tán entamando una soscripción popular pa cubrir los gastos de reparación del monolitu y la placa, pudiendo apurrise aportaciones económiques a la CC BBVA 0182 0600 01 0201586918.

http://infoasturies.net/index.php/asturies/item/2123-un-ataque-facista-estrozal-monolitu-quhomenaxeaba-a-los-milicianos-antifacistes-del-mazucu#.UjbiEz9-d8E