El MAZUCU (12 sept): Homenaxe a los lluchadores antifascistes (1936-2015): Alfon, los 5 de Zarréu, Urtzi y Telle
En Setiembre de 1937, tres la cayida d’ Euskadi y Cantabria, en manes de les tropes fascistes, estes entamaron la so ofensiva d’ocupación de l’Asturies revolucionaria a la que tantu odiaben. Na Sierra del Cuera desendolcóse la última batalla del norte, una dura batalla de resistencia pa frenar al exércitu de Franco y la Lexón Condor. Milicianos, fundamentalmente, asturianos, cántabros y vascos, de distinta ideoloxía, Comunistes, Socialistes, Anarquistes, etc, antifascistes tooos, amosaron el so heroísmu, defendendo les posiciones de la llibertá.
Güei, 78 años depués, cuando’l Franquismu entá ye llegal nes tierres d’España, y los sos heriedes políticos desarrollen programes d’aición empobinaos a finar con cualquier rispiu de derechu ciudadanu y social, ye más necesario que nunca rendir homenaxe a los nuesos cayíos, a los nuesos mártires y héroes. La so llucha sigue siendo exemplu de dignidá y compromisu, y nel so honor, el 12 de Setiembre de 2015, de magar les 12 de la mañana, taremos xuntos/es, los sos heriedes políticos, al marxe de les nueses diferencies, nel Altu de La Torneria, na Sierra del Cuera, nel Mazucu.
Como l’añu pasáu, l’actu d’esti añu nel Mazucu quier ser de nueu, un viaxe d’ ida y torna al homenaxe que la corporación municipal de Larrabetzu, pueblu hermanu de Vizcaya, fizo cola asociación vasca Ahaztuak 1936-1977, el pasáu xunu, a los asturianos que morrieron en combate defendendo dicha tierra y que foron enterraos na campa de Bolunburu, un paraxe a les afueres de dichu pueblu. La cordialidá, la fraternidá y camaradería que se vivió n’aquel actu, oblíganos, de bon grau, a realizar un actu como’l qu’agora tentamos, col ánimu de siguir afondando nel homenaxe a tola nuesa xente que morrió por un mesmu oxetivu de llibertá y xusticia social, particularmente a los que foron asesinaos y alcuéntrense en cunetes y foses comunes. L’actu del Mazucu nun queremos que seya namái un actu de señaldá o de xusticia, sinon un actu de xermandía y solidaridá internacionalista, ente pueblos hermanos, que por muncho que dalgunos/es nagüen por enfrentanos, nun vamos dexar qu’ocurra.
Esti año ye l’añu de la entrada d’ Alfon en prisión, de la estancia en prisión d’ Urtzi y Telle n’ Euskadi, de la pretensión d’ encarcelamientu de los 5 de Zarréu, del xuiciu a les persones qu’en Xixón participaron en piquetes de la última fuelga xeneral y cómo non de la reforma del Códigu Penal y de la entrada en vigor de la Llei Mordaza. Ye polo tanto un añu de llucha antirrepresiva y pola democracia real, eso que dalgunos/es llamamos Republica. Por eso naguamos por que l’actu d’El Mazucu seya una contribución eses lluches pola llibertá, pola solidaridá y el compañerismu que siempres carauterizó al pueblu vascu y asturianu.
Poro, el gallardón “Mª Jesús Suarez Rabanillo” a los valores republicanos, que n’años anteriores compartimos con Anita Sirgo, Antón Saavedra, Felipe Matarranz y un llargu etc de lluchadores exemplares, decidimos apurrí-ylu a Alfón, a los 5 de Zarréu y a Urtzi Martinez y Jon Telletxea como exemplu de llucha y compromisu. Queremos confluyir asina nun actu toos y toes aquellos/es que siguimos reclamando los ideales polos que morrió aquella xente, munches d’elles lloñe de la tierra que-yos vio ñacer. Y naguamos por facelo con un enfotu dedir construyendo redes de collaboración que nos permitan acumular fuercies p’abrir un procesu de cambiu social y políticu necesariu nel Estáu español, que permita que se reconozan y puean exercer tolos derechos de los pueblos y persones del estáu n’igualdá de condiciones, ensin les torgues, pilancos ya imposiciones de les oligarquíes, heriedes del franquismu, qu’inda nos gobiernen.
Llamamos a organizaciones y persones a sofitar esti actu, que finará con una xinta popular, de confraternización, faciéndolo publico, espardiéndolo, y participando nel mesmu. Nun ye hora de llamentos nin de llárima y pañuelu, sinon de confluencia y de llucha, y por ello vos llamamos a poner un granu de sable a esi camín el 12 de Setiembre nell Altu de La Torneria, nel Mazucu.
