La miliciana Maricuela, premio Juan Ángel Rubio
‘Maricuela’, más de cien años baillando
Ángeles Flórez Peón, cabera miliciana viva, recibió el premiu Juan Ángel Rubio, otorgáu pola Sociedá Cultural Xixonesa, ente la emoción y l’esmolecimientu pol ascenso del facismu “a nivel mundial”
PorArantza Margolles16 diciembre 2023
Diz Ángeles Flórez Peón que foi a los cuatro añinos cuando entamó a baillar. Cada vegada que la llevaban los sos pás, José y Restituta, al parque de Sama. Yera 1922. España yera una balsa al debalu en mediu d’una mar que taba a piques de ponese brava. Baillaba Ángeles al añu siguiente, cuando Miguel Primo de Rivera llegó ‘manu militari’ al poder; y n’abril de 1931, cuando entá nun cumpliera los doce, bailló tamién al son de les comparses que cellebraben la caída del rei. Foi entós, siempres lo cunta, cuando supo que yera republicana. Nunca diba dexar de selo, nin de baillar. Guei, colos 105 años cumplíos, sigue echando’l baille “al sentir a les cantores”, y tovía ayeri, arropada por decenes de persones, glayaba pidiendo la unidá de les izquierdes. “Hai que xunise tolo que se pueda, caún cola so idega, ye normal (…), pero xuníos. Si nun mos xunimos, nun ganamos nunca”, pronunció, con voz alta y firme, nel actu nel que se-y fizo entrega del premiu Juan Ángel Rubio, concedíu pola Sociedá Cultural Xixonesa.
Les trayectories de Flórez Peón (Blimea, 1918) y Rubio Ballesteros (Albaladejo, Ciudá Real, 1914 – Xixón 1993) son distintes, pero converxen en dellos puntos. El más importante de tóos, el “compromiso cola defensa de los valores de la tolerancia, de la democracia y del progresu”, dicía Pedro Roldán, presidente anguaño de la entidá que tamién fora lliderada por Rubio de 1970 a 1981 y de 1987 a 1993. Magar de que les ideoloxíes de Flórez, socialista de tola vida (con carné de les Mocedáes Socialistes dende 1936) y l’odontólogu, comunista, tean separtáes dende 1921 (¿baillaría yá ‘Maricuela’ con tres años nel parque de Sama?), dambos pertenecen a esa xeneración en “llucha escontra la dictadura franquista y el compromiso pola xusticia social” que sofrió, en pallabres de Roldán, “la represión de los intolerantes y reaccionarios: cárcel, esiliu, miseria, y dacuando, hasta la muerte; tóo por defensa de los valores de la convivencia ente españoles”.
Esa represión tradúxose, nel casu de Rubio y Flórez, col esiliu. El d’él, capitán republicanu, a una Francia en guerra, pasando pol campu de concentración d’Argelés; xuzgáu dempués a la vuelta, enxamás vencíu, militante hasta la muerte. El d’ella, más alantre, una fuxida a la llibertá de la Quatrième Republique, siguiendo a ‘Chano’ Rozada, el so home, cola fía mayor en brazos y la esperiencia d’un pasu pola cárcele traumáticu. Ye al recordalo anguaño l’únicu momento en qu’a ‘Maricuela’ -el nomatu-y vino del personaxe qu’interpretaba nuna obra teatral nes mesmes selmanes qu’anició la Guerra- se-y quiebra la voz. “Yá mui moza, yo entamé na llucha”, dicía ayeri. “Entamé na llucha y paguélo. Mui caru. Paguélo mui caru na mio mocedá”. Énte’l’españíu del golpe militar facista, Ángeles Flórez Peón féxose miliciana, magar que nun garró les armes. Foi enfermera; organizaba les viandes pa llevar pal frente; más nada. Nun importó. Un Conseyu de Guerra, en febreru de 1938, condergóla a 15 años de prisión: culpábenla de dar muerte a un soldáu del bandu subleváu. Anque la pena pudo reducise dempués, y Flórez consiguió la llibertá (vixilada) en 1941, sigue llevando na tiesta’l recuerdu de les muyeres que salíen de la celda pa nunca enxamás volver; de los camastros con chinchos de Saturrarán; del hermanu asesináu en Carbayín en 1934; del primer noviu fusiláu o del duru viaxe a Francia, al esconderite cola fía neña na barca d’un pescador de Pasaia.
Dempués, la vida. El pasáu miércoles, la Sociedá Cultural Xixonesa anunció’l fallu del Premiu Juan Ángel Rubio, convocáu de forma añal dende 1994, a ‘Maricuela’ “por representar l’espíritu de llucha pol pluralismo frente al ascenso de la intolerancia y el facismu, qu’amenacien a la democracia na actualidá, non yá nel nuesu país sinon tamién a nivel mundial”. El xuráu, constituyíu por Laura López (Directora Xeneral d’Urbanismu del Principáu d’Asturies), Carmen Eva Pérez (conceyala del Ayuntamientu de Xixón), ‘Santi’ Menéndez (presidente de la Federación Coral d’Asturies), ‘Pichi’ Pérez Miranda (galardonáu na edición anterior) y Antonio Rubio (el fíu de Juan Ángel Rubio col que tuvo n’Argelés), decidió por unanimidá. Nun hebo duldes.
Nun podía habeles. Anguaño, cumplíes les 105 serondes nel pasáu mes de payares, a Flórez Peón se-y sal el xeniu -que lo tien, y munchu, dicen- al sentir les noticies sobre l’ascensu de la estrema derecha o de les algaráes de tensión y odiu provocáes polos ‘ultres’. “Son situaciones que esti país puede soportar, pero nun quier dicise que nun seyan peligroses”, recordaba nel actu Monchu García, secretariu xeneral del PSOE xixonés, la agrupación na que ‘Maricuela’ milita dende que volvió a España, yá vilba, en 2003. “Ye importante que, como sociedá, nunca nun perdamos la pallabra”, dicía, a la vera d’una Ángeles a la qu’amás de baillar -y presta sonrir. “Calecéisme el corazón”, dixo ayeri, emocionada, la cabera miliciana viva énte’l’aplausu del públicu. Y ella, que lleva más de cien años baillando, sabe perbien de lo que fala.
https://www.nortes.me/2023/12/16/maricuela-mas-de-cien-anos-baillando/
