Memoria histórica, memoria lliteraria
Memoria histórica, memoria lliteraria
Oh, 36!, la primer obra de teatru de Lluis Portal
ANTÓN GARCÍA La compañía de teatru Syntexto lleva un tiempu echando per Asturies Oh, 36!, obra ganadora en 2007 del «Premiu Uviéu de Teatru». Sicasí, tovía nun tuviemos oportunidá de vela, a pesar del interés que despierta’l so argumentu, basáu en fechos reales. Mientres duró la Guerra n’Asturies, quince meses aguantó escondíu nun furacu de la so casa de Villaviciosa’l médicu y escritor católicu Carlos de la Concha, salvando con ello, probablemente, la vida. Quien lu buscaba, ensin éxitu, yera un dirixente políticu local, l’anarquista Cristóbal Cano
Sobre esos datos históricos, Lluis Portal (Villaviciosa, 1964) construye la so primer obra de teatru, una serie de cuadros que trescurren nel interior de la casa del médicu, onde entren y salen los persiguidores. El papel protagonista nun recái, como yera d’esperar, nin nel médicu escondíu nin nel anarquista que lu busca, sinón na criada de la casa, Ciriaca, un personaxe inspiráu nel teatru costumista (nun cuesta imaxinar a Aurora Sánchez faciendo’l papel), anque más comedíu, como correspuende a la traxedia que se vive n’escena. La llectura de la obra mantién l’interés, pero la cenciellez del plantexamientu xeneral, la falta de tensión y el fechu de que nun s’afonde más nos personaxes que protagonicen el conflictu fai qu’ún quede cola sensación de que nun s’aprovecharon tolos recursos.
A fin de cuentes, nada nos diz la obra sobre Cristóbal Cano, por exemplu, un personaxe históricu interesante (fundador del Atenéu Obreru de La Villa) al que se-y podía sacar más partíu n’escena. Nun ye nengún rapaz cuando españa la guerra, tien la mesma edá que De la Concha (cerca de los sesenta años), y parez ser que’l so ideariu políticu derivó dende’l reformismu melquiadista a posiciones anarquistes, llegando a pertenecer a la masonería. La obra de teatru remata con un diálogu ente persiguidor y persiguíu cuando yá les tornes cambiaron y camuden los papeles. Un diálogu tan esclarecedor como inverosímil naquel tiempu (¿ochobre de 1937?), cuando los enemigos siguíen siendo irreconciliables: Cano escapó d’Asturies per mar y morrió en Burdeos en 1948.
Dizque mientres tuvo escondíu, De la Concha (1877-1965) llevó un diariu en versu que ta inéditu. ¿Formen parte d’él los poemes que trescribe Lluis Portal? Nun s’indica, anque parez probable pol estilu. El títulu de la obra, acertadísimu, taría sacáu d’ún d’ellos, perteneciente a l’anotación del diariu del xueves 31 d’avientu de 1936, que termina asina: «¿Yá morristi, oh trenta y seis?/ ¡Pues vete al cuernu!».
http://www.lne.es/cultura/2010/06/10/memoria-historica-memoria-lliteraria/927508.html
