L’intentu d’acusar por prevaricación al Xuez Garzón por intentar investigar los crimes del franquismu: un pasu más na impunidá y un actu de represion tapada escontra’l movimientu memorialista y republicanu
Pa la Federación Asturiana Memoria y República (FAMYR) el Xuez Garzón nunca foi “santu de la so devoción”, dáu’l so murniu papel en delles causes de represión política nel estáu español y la so más que cuestionable técnica xurídica a la hora d’instruyir les causes penales. Lo anterior, nun ye óbice pa que veamos con gran esmolición l’autu acusatorio del Tribunal Supremu.
Dende FAMYR, como dende la Federación Estatal de Foros pola Memoria, siempres consideramos que la vía escoyida por Garzón nun yera l’adecuada al nun ser l’Audiencia Nacional competente, y que por tantu les falses mires xeneraes podría traer gran frustración pa les victimas y les sos families. El tiempu dionos, desgraciadamente, la razón, pero non por ello, dende FAMYR, podemos compartir l’actual decisión del Tribunal Supremu, que baxo la cobertoria de denuncies presentaes por organizaciones de la estrema derecha (¿qué llexitimidá puede tener Falange nun estáu realmente democráticu?), participes y coheredaes del Franquismu, pretende acusar de prevaricación a un Xuez que, con meyor o peor fortuna xurídica, atrevióse a abrir una investigación y intentó que les normes del derechu internacional aplicáranse n’España pa que nun siguiera la impunidá del Franquismu.
Una de les bases principales de l’acusación ye que’l Xuez Garzón nun aplicó la Llei d’Amnistía del 1977. Los xueces del supremu nun pueden ignorar que nenguna llei puede amnistiar los crimes escontra la humanidá. Amás cerraríase en gran midida la posibilidá de que cualesquier xuez n’España, sía del órganu xudicial que sía, pueda investigar nel futuru los crimes de lesa humanidá. Taría cerrándose el círculu interpretativu de considerar a Llei d’Amnistía de 1977 como una verdadera “Llei de Puntu Final”. Una decisión de tan fondu caláu, que pretende amedranar a xueces y fiscales, y al movimientu memorialista y republicanu, pa que naide atrévase nel futuru a cuestionar el modelu d’impunidá de la sacrosanta Transición, nun puede cuntar más que con la muesa enérxica de condena y repulsa.
Decisiones como esta demuestren una vegada más que nos órganos xudiciales d’esti país siguen presentes los herederos del Franquismu, y que yera en gran parte verdá que Franco lo dexó “tou arreyáu y bien arreyáu”, pa que naide pudiera investigar los sos crimes, equiparables a los del nacifascismo alemán y italianu. Nuna etapa hestórica, como l’actual, na que la derecha más reaccionaria sigue faciendo “revisionismo hestóricu”, decisiones xudiciales como estes nun faen más que consolidar la meyora del pensamientu políticu y xurídicu más reaccionariu, asina como permitir el envalentonamiento de los movimientos políticos de calter neofascista que pueden espoxigar por mor de l’actual crisis económica del Capitalismu.
Tamién esta decisión xudicial demuestra una vegada más que la mal llamada “Llei de Memoria Hestórica”, impulsada pol PSOE y los sos sofitos parllamentarios, nun yera más qu’una cortina de fumu publicitario, que nun respondía a les esixencies de “VERDÁ, XUSTICIA Y REPARACION” de les victimas, y que coayudaba a cerrar cualesquier tipu d’investigación xudicial del Franquismu. Una vegada más ponse sobre la mesa la necesidá de dar pasos más allá, de superar el marcu d’impunidá franquista, a la lluz del derechu internacional, y de nun intentar llegar a nueves componendas que pa nada van resolver los problemes de fondu que’l movimientu memorialista siempres plantegó.
Les llendes del marcu xurídicu-políticu de la Transición vuelven quedar clares con decisiones como estes, y una vegada más tien de quedar claru que namai la rotura col Franquismu, pente medies de un procesu constituyente republicanu, puede traer una democracia de verdá al Estáu Español, onde los crimes escontra la humanidá nun queden impunes. Nesi camín de confluencia de lluches del movimientu republicanu y memorialista ye nel qu’esta FAMYR y pol que va siguir apostando, col deséu que más llueu que tarde otres fuerces y sectores sociales incorpórense al mesmu con igual entusiasmo que nosotros y nosotres faémoslo.
http://www.aruelu.com/spip.php?article1521
