Crónica REPUBLICASTUR 2009

REPUBLICASTUR 2009: de Ribesella a Mieres, de la revolución d’ochobre del 34 a la III República.

L’añu pasáu, a iniciativa del “Foro por la Memoria del Oriente de Asturias”, col sofitu de “Memoria Histórica Asturiana”, “Foro Ciudadano por la República” y “Foro por la Memoria y la República de Avilés y comarca”, el 12 de Setiembre, organizábase’l primer Festival “REPUBLICASTUR” en Ribesella, villa asturiana símbolo de la Monarquía, tres la boda de los ciudadanos Felipe de Borbón y Leticia Ortiz. Los/es republicanos d’Asturies nun podíen aceptar ensin facer nada tala imposición, y por eso entendieron que Ribesella debía ser capital, anque fuere un día, de la República y llugar d’homenaxe a los sos héroes. Esti añu, 75 aniversariu del Ochobre Roxo de 1934, “REPUBLICASTUR” celebrose en Mieres, cuna de la revolución del 34.

A finales del 2008 los cuatro grupos antes nomaos, depués de llegar a un alcuerdu nun documentu políticu y unos estatutos, crearon la “FEDERACIÓN ASTURIANA Y REPUBLICA” (FAMYR), que marcose’l “REPUBLICASTUR 2009” como una de les sos principales llabores. Un añu de trabayu y llegó’l 17 d’Ochobre de 2009, nel Recintu Ferial de Mieres inagurábase’l “REPUBLICASTUR 09”

MESA REDONDA: “LOS HEREDEROS D’OCHOBRE ANTE LOS SIEGLOS XXI”

F. García Noval, Soc. Cultural Gijonesa, presentó l’alderique nel que participó en primer llugar Pedro García Bilbao, Federación Estatal de Foros por la Memoria (entidá a la que ta federada FAMYR), que destacó la necesidá de siguir cola llucha antifacista de los héroes d’Ochobre, asina como la necesidá de dir faciendo República cada día, de llevar el mensaxe republicanu y la representación republicana a les instituciones y de converxer nuna gran Convención Republicana que permita superar la monarquía impuesta na mal nomada Transición.

Depués intervino Francisco de Asís, Sec. Xral del PCA, en nome del PCE, ya que Francisco Frutos nun pudo llegar a Mieres hasta unos minutos depués del entamu del actu. Foi tamién mui claru en llamar a la necesidá d’un Procesu Constituyente que permita superar el réxime impuestu na Transición y que posibilite abrir pasos a una sociedá que supere’l Capitalismu. Paco de Asís tamién quiso dexar claru qu’esa República debía ser una República al serviciu de los/es trabayadores.

Resultó enforma interesante la esperada intervención de Fidel Manrique, Sec. Xral de la CNT. Dexó claru qu’ellos nunca tuvieron nin tarán por La República porque nun creen que’l problema seya’l cambiu de réxime, sinon la superación del Capitalismu. Fidel Manrique afirmó qu’ellos nun se opondríen al avance d’una III República (ya que ente otres coses significaría romper pa siempres col Franquismu) pero siguen apostando pola aproclamación del Comunismu Llibertariu, ensin necesidá de fases intermedies.

Finó les intervenciones Carmelo Suárez, Sec. Xral del PCPE, que centró la so participación en tratar d’esmenuzar les lleiciones del Ochobre del 34 pa la llucha de güei pola Revolución Socialista. Carmelo insistió en que’l sistema, por mui democráticu que lu quieran presentar, nun dulda nunca, como nun lo fizo nel 34, n’usar los graos de violencia que-y seyan necesarios p’acabar col avance de les lluches populares, lo qu’esfuma les ilusiones, aquelles ilusiones de los sectores reformistes que creen posible’l avance hacia’l Socialismu siguiendo les regles del xuegu del Capitalismu. Resaltó tamién Carmelo Suárez la necesidá de la unidá pola base de les fuercies de la izquierda revolucionaria pa poder volver a facer un proyeutu d’emancipación de la clas obrera que tenga na llucha de mases la so principal arma.

Posteriormente dióse un ricu alderique, nel que los ponentes espusieron los sos argumentos, pero non pa confrontiar o estrozar a los compañeros porque toos ellos manifestáronse de forma clara pola necesidá de la unidá.

LOS INVITAOS

Dende’l día anterior y güei, al mesmu tiempo que’l alderique, puestos de distintes asociaciones facíen del recintu ferial un arcoíris de colores. Dende troskistes de la Fundación Andreu Nin, a Comunistes, Anarquistes de la CNT, pasando por republicanos del Ateneo Obrero de Xixón, y como non, Amnistía Internacional, Fundación de Investigaciones Marxistas, SOS Racismu y un llargu etc. Una bona muestra de pluralidá ideolóxica y social.

ENTREGA DE GALLARDONES A LOS VALORES REPUBLICANOS

A les 19:00 hores entamaba’l actu políticu nel que tuvieron más de 400 persones. La “BANDA GAITES DE MIERES” entró nel Salón d’Actos a ritmu del “HIMNU RIEGO” y empalmaron con más pieces de la nuestra música tradicional.

L’actor y monologuista Carlos Alba “Cellero”, presentó l’actu faciendo rir munchu a la xente colos sos golpes y enforma cuando pidió un minutu de silenciu pa’l PSOE, IX, CCOO y UXT, por nun asistir a REPUBLICASTUR, lo que yera lóxicu, según les sos palabres, porque quien va a “59 segundos” nun va a REPUBLICASTUR.

Otra vuelta Rafa Velasco, FAMYR, esplicó los antecedentes y oxetivos d’esti actu. Rafa aprovechó pa dexar claru que la Revolución del 34 foi un pasu más na llucha que finó na victoria del Frente Popular, el 13 de Febreru de 1936, y na llucha posterior escontra l’alzamientu facista, nel que la bandera tricolor y la llucha pola República, tresformose nuna causa internacional de los/es progresistes del mundiu.  Tamién aprovechó pa esixir un INDULTU PLENU, ENSIN CONDICIONES, ENSIN DEMANDA DE PERDÓN NIN ASUNCIÓN DE RESPONSABILIDÁ pa CÁNDIDO Y MORALA, esixiendo al Presidente RODRÍGUEZ ZAPATERO una decisión pa ello, buscando’l paralelismu ente la desigual actitú d’estos supuestos gobernantes d’izquiera y la imaxe de la diputada Dolores Ibarruri lliberando a los héroes d’Ochobre de la cárcel Modelo d’Uviéu. Finó la so intervención emitiendo la propuesta de FAMYR de que les fuercies de la izquierda axúntense nuna Mesa Pola Memoria y la República.

Depués intervino Francisco Frutos, PCE, que dexó claru’l compromiso republicanu del so partíu y la necesidá de facer avanzar un proyeutu republicanu y cívicu como forma de que los/es trabayadores recuperen el terrén perdíu nos caberos años. Siguio-y Carmelo Suárez PCPE, que nuna intervención enforma emotiva, recordó’l papel históricu de xente como Juan Ambou, héroe d’Ochobre, na llucha pol Socialismu nel Estáu Español. Ensin pausa y ante un públicu percontentu, intervino Fidel Manrique, Sec. Xral de la CNT, que volvió dexar claru que anque asistieron al actu, la III República nun ye la so llucha sinon la supresión del estáu pol Comunismu Llibertariu ya que la CNT sigui los planteamientos de los Anarquistes que llucharon n’Ochobre del 34.

Finaron el turnu de saludos los representantes de les organizaciones xuveniles. Toos ellos destacaron el papel de la mocedá na llucha d’Ochobre, recordaron l’importante avance que foi la Juventud Socialista Unificada (JSU) y explicaron la necesidá d’organizar la llucha xuvenil escontra Bolonia, escontra’l Facismu, polos derechos llaborales con una llucha más global pa superar el Capitalismu, pola III República y’l Socialismu.

Darréu, llegó la parte más emotiva de REPUBLICASTUR cola entrega de los gallardones a los valores republicanos a:

Jose Mª Laso, Familia de Aida de la Fuente, Macrino Suárez, anque’l momentu más emotivu protagonizáronlu Felipa Del Río y Celestina Marrón, que ficieron soltar la llárimina al públicu porque son el exemplu de la llucha de les muyeres asturianes escontra la doble esplotación: como muyeres y como obreres. Amás fízose entrega de gallardones a David Moyano, José Luís García Rua y Marcos Ana. Clausuró l’actu la intervención de Pedro García Bilbao, nel nome de la Federación Estatal de Foros por la Memoria, que destacó la importancia y trescendencia que REPUBLICASTUR tendrá nel futuru p’ayudar a la xuntanza de les fuercies republicanes nel Estau Español.

EL CONCIERTU

Cientos de persones, unes dos mil, nel momento más importante cola actuación de Boikot, pasaron pel recinto ferial, cantaron, baillaron y tamién ficieron “botellón”, porque nel REPUBLICASTUR tou menos el facismo taba autorizáu.

Los grupos: Los remeros del Zapardiel, Taranuss, Fe de Ratas, Boikot, Desakato, Skontra y Sambre, fueron los encargaos de prollongar el conciertu hasta les 7 la mañana, hora na que finó REPUBLICASTUR 09 y entamó a preparase REPUBLICASTUR 2010 pa que seya más xeitosu que’l d’esti añu y siga faciendo a Asturies tar na vanguardia y nun marcu afayaízu pa la xuntaza de la izquierda.