Sánchez Vicente tacha de «desastre» la revolución del 34 y considera’l so mitu una torga pal desarrollu d’Asturies
L’escritor, ensayista y presidente del Partíu Asturianista Xuan Xosé Sánchez Vicente considera que’l «mitu» de la revolución d’ochobre del 34 supón una torga pal desarrollu d’Asturies a nivel económicu, y sigue condicionando la vida social y política de la comunidá.
El responsable del PAS ofrecerá esta tarde, de magar les 19.30, una conferencia nel Atenéu Jovellanos de Xixón, baxo’l títulu ‘Octubre del 34: la foguera y les ascues’.
En declaraciones a Europa Press, el políticu y ensayista asturianu fizo un adelantu de la so intervención considerando que la revuelta del 34, «dende’l puntu de vista militar pa los asturianos foi un embarcazu, una operación tan desastrosa como la d’Anual», pero que tamién tuvo «consecuencies y tovía sobrevive’l so mitu como un modelu únicu pa proponer a la mocedá», dalgo que criticó duramente.
Ye más, refirióse a unes declaraciones del parlamentariu d’Izquierda Unida na Xunta Xeneral, Francisco Javier García Valledor, «que cuando propunxo fundar un nuevu partíu d’izquierdes punxo como modelu la revolución del 34». Basándose néstos y otros exemplos, Sánchez Vicente consideró que «hai dalgunos vectores que condicionen la nuesa realidá, y la nuesa condición del mundu llaboral», y que creen «dificultaes pa que s’instalen equí empreses». «Toa esa permanencia como un mitu positivu de lo que foi un desastre tien munches d’estes consecuencies nesti momentu sobre la vida social, política y llaboral d’Asturies», opinó.
Dende’l so puntu de vista, la pervivencia del «mitu» provoca «un clima pa que seyamos un país nel que teniéndose invertío miles de millones de pesetes nun mos diere nengún resultáu n’emplegu», señalando tamién que «colos fondos mineros, hai en Lleón miles de proyectos y equí nun apaecen esos proyectos».
Por esti motivu, apostó por «axustar» el recuerdu d’Ochobre 34 nel tiempu. Al so xuiciu, «siguir calteniéndolu como una antorcha ideal, impídemos mirar pal futuru».
http://www.europapress.es/asturianu/noticia-sanchez-vicente-tacha-desastre-revolucion-34-consideral-so-mitu-torga-pal-desarrollu-dasturies-20091021150922.html
