Campaña Fíos predileutos A los Guerrilleros y Resistentes antifacistes asturianos 1937-1977
Dende’l final oficial de la Guerra Civil, foi’l TerciuMóvil del Exércitu español, la Falange, y sobre to la Guardia Civil, los encargaos de perseguir y aniquilar a los grupos de resistencia democrática organizaos en guerrilles. La decisión d’adxudicar un papel preeminente a la Guardia Civil debiose tanto a la so propia ñatura, ámbitu d’actuación y esperiencia d’esti institutu armáu (responsable de perseguir a bandoleros y carlistes durante’l sieglo XIX), como a la intención de menospreciar ya infravalorar internamente y esternamente- la resistencia al réxime facista. Encargándose prioritariamente a la Guardia Civil y no al Exércitu la represión, pretendíase per un llau que nun se reconociera que tratábase d’un problema grave o de la mesma continuidá de la guerra. Per otru llau, se quería visualizar ente la sociedá que se trataba d’un problema de delincuencia y non d’una llucha en defensa del réxime republicanu. Pa ello, utilizáronse tamién táutiques propagandístiques como’l silenciamientu de les aiciones con conteníu políticu y l’espardimientu d’aquelles más violentes que pudieren xenerar un ciertu refugu per parte del conxuntu de la sociedá. Nel mesmu sen, una circular de la Direciión Xeneral de Seguridá de 11 d’abril de 1947 prohibía espresamente utilizar el términu guerrilla, maquis o guerrilleros, y obliga a establecer como terminoloxía a nivel internu y esterno, los conceptos bandoleros, foraxíos o bandolerismu.
Pero la llucha armada pola democracia esistía, y yera mayor de lo que’l propiu gobiernu golpista taba dispuestu a admitir. Hasta’l puntu que’l Ministeriu d’Interior dio orde d’aniquilar a los guerrilleros y enllaces mediante la llei de fugues-, a la vez que s’amplió en gran medida la plantilla de la Guardia Civil (pasose de 30.000 efeutivos en 1936 a 54.000 en 1941). La importancia de la guerrilla tá amosada pol fechu que nel periodu 1943-1952 se concedieren poles aiciones escontra ella, 908 cruces del méritu militar -que configuraron el popularmente llamáu “medalleru”-, 970 citaciones nes órdenes xenerales del cuerpx, qu’hubiere más de mil enfrentamientos armaos y más de seiscientas baxes ente feríos y muertos na Guardia Civil.
Poro, anque suel establecese’l añu 1952 como’l añu en qué se punso fin a la llucha guerrillera a favor de la democracia representada pol llexítimu réxime republicanu, quedaron dalgunos focos de resistencia guerrillera hasta los años 60, como ye’l casu de los representaos por Quico Sabater, Ramón Vila Capdevila “Caracremada”, José Castro Veiga “Piloto”, etc.
La vergoñosa realidá d’anguañu nel estáu español, ye que oficialmente a los guerrilleros se-yos sigue asociando a la condición de bandoleros y terroristes (calificación por tantu non amnistiable nin siquierae pola preconstitucional llei d’Amnistía), yá que les sos sentencies condernatories franquistes siguen tando vixentes. Durante años, y ente toos los gobiernos democráticos, gobernara quien gobernara, AGE col sofitu d’otres asociaciones y dalgunos diputaos de grupos parlamentarios d’izquierdes, reclamaron el so reconocimientu xurídicu.
El parlamentu español refugó toles Proposiciones de llei, enmiendes y entrugues parlamentaries, presentaes pa que la so equiparación a tolos niveles colos antiguos miembros de les Fuercies Armaes oficiales republicanes fora una realidá. Ye una situación vergoñosa, incomprensible, inaudita y absurda n’otres democracies que sofrieron pasaos facistes, nes que se reconoz y honra a la resistencia.
Por too ello urxe, pues, un reconocimientu de la llucha pola llibertá de los defensores del llexítimu réxime republicanu, d’igual manera como procedieron n’otros países como Francia, Alemania o Rusia, por poner tres exemplos. Nesi sen, René Pérez, responsable de la Unión de Excombatientes Franceses en España, reivindicando la reparación d’esta inxusticia, afirma que “A los guerrilleros franceses que llucharon escontra’l nazismu consideráselos héroes nacionales; tienen una pensión especial, los mutilaos reciben asistencia a domiciliu y foron condecorados en repeties ocasiones.”
Esti 2013 dende la Federación Asturiana Memoria y República (FAMyR) l’Asociación para la creación del archivo de la guerra civil, las brigadas internacionales, los niños de la guerra, la resistencia, la guerrilla y el exilio español (AGE) y la Asociacion de Descendientes del Exilio retomamos una nuea campaña espardiéndola a toos aquellos guerrilleros y resistentes antifacistes asturianos qu’entá queden vivos. Vivos pero que, entá güei, siguen enterraos nel escaezu ya ignoraos pola memoria coleutiva del pueblu asturianu, robándonos l’ejemplu de la so vida como lluchadores pola llibertá.
D’igual mena y pa honrar a toos aquellos lluchadores anónimos propusimos la inclusión d’un reconocimientu al “Guerrilleru antifranquista desconocíu”.
Por tantu y dada la so relevancia, dende la Federación Asturiana Memoria y República -FAMYR-, y dende l’Asociación Archivo Guerra y Exilio –AGE- atalantamos que son merecedores de les más altes distinciones que, a nivel institucional, se conceden n’Asturies: la declaración de Fíu predileutu y la Medalla d’oru d’Asturies. La primera solo se concede a persones tovía vives demientres que la segunda pué ser concedía a fallecíos anque solo, csmo máximo, a dos persones
Per too ello recabamos la to andecha pa solicitar al Principáu d’Asturies la declaración de Fíu predileutu d’Asturies palos guerrilleros y resistentes que se detallen nel anesu. Necesitamos el vuesu sofitu esplícitu polo que vos agradeceríames nos ficieseis llegar l’adhesión, bien individual bien coleutiva a la “Campaña Fíos predileutos d’Asturies a los guerrilleros y resistentes antifacistes asturianos 1936-1977”.
Podéis enviar les vueses adhesiones (nome, apellíu y DNI) a:
famyr@memoriayrepublica.org y age@derechos.org
o por corréu postal a Belmonte de Miranda, 4, entlu, dcha, 33206 Xixón, Asturies y el so desendolcu podréis seguilo na nuessa web www.memoriayrepublica.org
Por últimu, ye seguru que nel nuesu pequeñu esfuerciu de reconocimientu escaezerémonos de dalguien. Llamentámoslo y vos agradeceríemos nos enviaseis la información pertinente pa incluilu na campaña de reconocimientu.
La campaña culminará el 14 d’abril cola inauguración del Parque al Comandante Robert en Xixón, cola presencia del propiu Comandante Robert y el restu de homenaxeaos no que pretendemos seya una auténtica folixa popular de reivindicación de la III República.
Salú y República
Llistáu
Fíos predilectos d’Asturies
0. Guerrilleru antifranquista desconocíu
1. José Antonio Alonso Alcalde, Comandante Robert
2. Felipe Matarranz, Comandante Lobo
3. Aladino Castro.
4. Vicente García Riestra.
5. Angel Alvarez Fernandez
6. Felipe Martin Pajares
7. Ángel Villar Tejón
8. Alfredo Rotella Moran
9. Angeles Alvarez Fernandez
10. Gregorio Cenitagoya
11. Aquilino Gomez
12. Joaquín Fernández
13. Luís el de la Matiná
14. Aquilino Fernández Fernández.
15. Constantino Alonso González
16. Nicanor Rozada Garcíá
17. Urbano Álvarez Álvarez
18. Ángel Zapico Fernández
