01/08/2013 por FAMYR
YÁ SON 11 LOS CONCEYOS ASTURIANOS QU’APROBARON MOCIONES N’APOYU A LA QUERELLA ARXENTINA
Once conceyos asturianos yá aprobaron nos sos plenos una moción d’apoyu a la querella arxentina presentada en Buenos Aires por «xenocidiu y/o crímenes de lesa humanidá cometíos n’España pol franquismu y los sos autores ente’l 17 de xunetu de 1936 y el 15 de xunu de 1977». Dende’l mes d’abril d’esti añu, un grupu de ciudadanos y ciudadanes constituyimos n’Asturies una plataforma que na actualidá forma parte de la Coordinadora Estatal d’Apoyu a la Querella Arxentina (http://www.ceaqua.org/plataforma-asturiana/). El resultáu de los contactos establecíos nestos meses foi que 11 conceyos aprobaron nos sos plenos mociones d’apoyu a la querella: Avilés, Mieres, Llangréu, Ayer, Castripol, Riosa, Noreña, Morcín, El Franco, Samartín del Rei Aurelio y Corvera. Esperamos que s’aprueben nestos meses vinientes, ente otros, en L.lena, La Ribera, Llaviana, Grau, Bual y Carreño.
Tamién recoyimos un bon númberu de firmes d’apoyu individual ente alcaldes y conceyales, amás de ciudadanos en xeneral y persones rellacionaes cola defensa de la Memoria Histórica.
La plataforma d’Asturies ta centrando’l so llabor en dar a conocer la iniciativa y posibilitar que les persones que sufrieron la represión y/o los familiares puedan utilizar esta vía pa esixir la verdá, xusticia y reparación.
El 18 de xunetu n’Uviéu, conxuntamente con Amnistía Internacional-Asturies, presentemos l’informe espublizáu por esta entidá El tiempo pasa, la impunidad permanece, sobre les víctimes de la guerra civil y el franquismu, cola presencia del autor, Ignacio Jovits.
Depués del mes d’agostu vamos retomar l’actividá, estableciendo contactos con más conceyos y empezando una ronda d’entrevistes con tolos grupos parllamentarios de la Xunta Xeneral del Principáu, cola mira de que s’apruebe una Declaración Institucional apoyando la Querella contra los Crímenes del Franquismu.
leer más