Sobrevivir: un día más
Xuan Santori reflexona sobre les memories de Vincent García Riestra, presu de Buchenwald
antón garcía 31.05.2018 | 03:54
¿Qué ye un ensayu? Frente a la última obra de Xuan Santori la pregunta resulta pertinente, porque ye un llibru, 42.553: Depués de Buchenwald, que llega arropáu pol premiu «Máximo Fuertes Acevedo» d’ensayu. Nes reuniones preparatories pa la creación d’esti premiu, a finales de los ochenta, poníase enriba de la mesa la posibilidá de qu’a una convocatoria pa ensayu (reflesión subxetiva sobre un tema) terminaren presentándose estudios académicos o heteroxenies reuniones d’artículos periodísticos, nun momentu nel que l’ensayu n’asturianu yera una asignatura pendiente. Nun yera esperable que’l premiu apilara pa xéneros más lliterarios, como ocurre con esta obra de Santori: sobre’l testimoniu oral de Vincent García Riestra, asturianu de La Pola Siero nacíu en 1925 como Vicente y superviviente del campu de concentración nazi de Buchenwald, Santori enmarca un relatu recoyíu en 2017 nos fechos históricos de lo qu’ocurrió naquellos años d’horror y exterminiu. Memories comentaes, profusamente ilustraes nuna guapa edición, 42.553 nun ye un ensayu.
Nun importa. Santori consigue nesta obra rescatar p’Asturies y n’asturianu’l testimoniu d’un protagonista involuntariu del horror nazi, una víctima que llogró sobrevivir y qu’anuncia a los sos 93 años la so asistencia a la presentación del llibru n’Asturies. El relatu empieza cuando marcha d’Asturies pa Francia’l 22 de setiembre de 1937 nun barcu que sal del Musel, escapando del avance de les tropes sublevaes contra la República. Regresa a Cataluña, zona republicana, hasta qu’en xineru del 39 los franquistes tomen Barcelona y tien que cruciar la frontera camín de Francia, al exiliu. Colabora cola resistencia y termina siendo deteníu pola Xestapo’l 22 de payares de 1943. El 24 de xineru de 1944 llega García Riestra, con 19 años acabante cumplir, al monte d’Ettersberg, na contorna de la cultísima Weimar, onde s’asitia’l campu de Buchenwald. El relatu que fai l’asturianu de la entrada al campu ye pormenorizáu; cuenta la manera en que la maquinaria alministrativa nazi empezaba quitándo-yos el so pasáu: dende la ropa que trayíen al propiu nome, pa pasar a ser un númberu, el 42.553 nel so casu, y una lletra S nun triángulu coloráu que lu identificaba como español.
Un añu y tres meses va tar nesi campu García Riestra, con un únicu obxetivu: sobrevivir. A ello va contribuyir, según el so propiu testimoniu, la recomendación d’un prisioneru alemán, antigu miembru de les brigaes internacionales que llucharon contra’l facismu n’España, que-y encamienta que, cuando-y pregunten pol oficiu, diga que ye cocineru, anque nun fuera verdá. Y esi oficiu imaxinariu ye’l que lu salva de siguir trabayando, en réxime d’esclavitú, na cantera onde lu destinen de primeres pa pasar a ocupar un puestu nes cocines del campu, onde les posibilidaes de sobrevivencia yeren muncho mayores. Porque d’eso se trata simple y llanamente: salir vivu d’aquel infiernu. «Un día más; puedo sobrevivir» repetíase a menudu García Riestra.
El de Buchenwald foi ún de los pocos campos nel que los prisioneros consiguieron arrabater el control a los nazis enantes de la llegada de los aliaos, que tien llugar el 11 d’abril de 1945. Curiosamente, el relatu de García Riestra sobre los acontecimientos posteriores (la vuelta a la casa de Cadouin, na Dordoña francesa, pa reunise cola madre y los hermanos) resulta más emocionante que’l testimoniu obxetivu, serenu, del so pasu por Buchenwald. Pero ye estremecedor tol relatu del so cachín de vida, de ciudadanu cásique anónimu nel torbolín mesmu de la historia, que nos regala Xuan Santori nesti llibru extraordinariu, únicu nes nueses lletres.
