La impunidá n’España y los crímenes franquistes: Manual pa neófitos en Asturianu
La impunidá n’España y los crímenes franquistes
(Manual pa neófitos)
Indiz
Entamu………………………………………………………………………………… 2
Los drechos de les víctimes y familiares………………………………….. 3
Franquismu, llei d’Amnistía y Llei de Memoria…………………………… 5
Les fueses comunes del franquismu……………………………………….. 9
La resistencia armada antifranquista: Los guerrilleros……………… 12
Los Archivos………………………………………………………………………. 12
Sumíos/Desapaiciones forzoses……………………………………………. 13
ANEXU Propuesta de programa escontra la impunidá y de fortalecimientu democráticu 15
Federación Asturiana Memoria y República (FAMYR), Asociación Lázaro Cárdenes, Atenéu Obreru de Xixón, Sociedá Cultural Xixonesa, Ahaztuak 1936-1977, Agrupación Pozo Grajero, Equipu Nizkor
7 d’abril de 2017
Entamu
Rescampla que nos últimos años la sociedá española sensibilizóse pola situación de les víctimes de la represión franquista, lo que dio llugar al surdimientu de numberoses actividaes rellacionaes con estos fechos. Pesi a los años trescurríos, cualesquier que s’avera a esta cuestión, atopa per parte l’Estáu cola desdexación de la situación de les víctimes, de la memoria y de los drechos humanos.
Y ye precisamente dende’l discursu de drechos humanos dende onde puede faese frente a la situación y esixir al Estáu la xusticia necesaria pa poner fin a l’escaezu, la desdexación ya impunidá a que se condergó esta cuestión.
Nun intre en que los modelos d’impunidá impuestos n’otros países, como Arxentina y Chile, vieron cayer la so llexitimidá y la so llegalidá, ye yá hora que l’Estáu Español, en parte responsable de dichos modelos, asuma la so propia problemática, la que denominamos el “modelu español d’impunidá”, y ponga fin al mesmu en forma democrática y col respetu que toles víctimes merecen, pero teniendo bien nidio que la finalidá ye afitar les llibertaes civiles y los drechos humanos.
Ye necesario que se pescancie que la xusticia ye lo contrario de la vengación. Ye necesario que nun s’oldee, nun discursu perversu, el conceutu de xusticia al de vengación, pues ello fai posible que se considere l’escaezu como una de les bases del estáu de drechu. Nenguna sociedá puede sobrevivir al desconocimientu de la so propia hestoria, por horrible qu’ésta seya… Y rescampla que’l discursu de drechos humanos y llibertaes nun se recuperó entá de la perda de dambos valores tres el golpe d’estáu franquista.
Los drechos de les víctimes y familiares
La impunidá defínese como “la inesistencia, de fechu o de drechu, de responsabilidá penal por parte los autores de violaciones de los drechos humanos, lo mesmo que de responsabilidá civil, alministrativa o disciplinaria, porque escapen a toa investigación con mires a la so inculpación, detención, procesamientu y, en casu de ser reconocíos culpables, conderga, inclusive a la indemnización del dañu causáu a les sos víctimes”. [Informe final alrodiu de la cuestión de la impunidá de los autores de violaciones de los drechos humanos (drechos civiles y políticos) preparáu pol Sr. L. Joinet de conformidá col resolvimientu 1996/119 de la Subcomisión. Y/CN.4/Sub.2/1997/20. 26 de xunu de 1997, d’equí p’arriba Y/CN.4/Sub.2/1997/20]
En rellación colos drechos de les víctimes, consideraes como suxetos de drechu, ye deber de los Estaos (Y/CN.4/Sub.2/1997/20/Rev.1) garantizar:
a) el drechu de les víctimes a saber. Nun se trata solamente del drechu individual que toa víctima, o los sos parientes o amistaes, tien a saber qué pasó en cuantes que drechu a la verdá.
El drechu de saber ye tamién un drechu coleutivu que tien el so orixe na hestoria pa evitar que nel futuru les violaciones se reproduzan. Por contrapartía tien, a cargu l’ Estáu, el “deber de la memoria” con cuenta de prevenir contra les deformaciones de la hestoria que tienen por nome’l revisionismu y el negacionismu. La conocencia, pa un pueblu, de la hestoria de la so opresión pertenez al so patrimoniu y como tal ten de ser calteníu.
b) el drechu de les víctimes a la xusticia; Implica que toa víctima tenga la posibilidá de faer valir los sos derechos beneficiándose d’un recursu xustu ya eficaz, principalmente pa consiguir que’lso opresor seya xulgáu, llogrando la so reparación. Nun esiste reconciliación xusta y durable ensin que seya apurrida una respuesta efeutiva a los deseyos de xusticia.
El drechu a la xusticia confier al Estáu una serie d’obligaciones: la d’investigar les violaciones, persiguir a los sos autores y, si la so culpabilidá ye afitada, d’asegurar la so sanción.
c) el drechu a algamar reparación. El derechu a reparación implica tantu midíes individuales como midíes xenerales y coleutives. Nel planu individual, les víctimes tienen de beneficiase d’un recursu eficaz. Esti drechu entiende los trés tipos de midíes siguientes: Midíes de restitución, Midíes d’indemnización y Midíes de readautación.
Nel planu coleutivu, les midíes de sentíu calter simbólicu, a títulu de reparación moral, tales como la reconocencia público y solemne per parte del Estáu de la so responsabilidá, les declaraciones oficiales restableciendo a les víctimes la so dignidá, les ceremonies conmemoratives, les denomaciones de víes públiques, los monumentos, dexen asumir meyor el deber de la memoria.
Franquismu, llei d’Amnistía y Llei de Memoria
De magar el 14 d’abril de 2004, cola espublización del informe “La cuestión de la impunidá n’España y los crímenes franquistes” ya’l so Plan d’Aición, dio entamu’l desendolque d’un discursu sobre les víctimes republicanes de la Guerra Civil, de la Segunda Guerra Mundial y de la dictadura franquista. Por vegada primera fixéronse públicos documentos que dexen la categorización criminal del réxime franquista y de la so participación, como parte de los Países de la Exa, na guerra d’agresión nacionalsocialista que carecieron la práutica totalidá de los países europeos, pero bien especialmente los países del Centru y l’Este d’Europa.
D’especial importancia ye’l resolvimientu 39 (I) de 12 d’avientu de 1946 de la ONU, que define al réxime franquista: “(a) Nos sos oríxenes, naturaleza, cadarma y conducta xeneral, el réxime de Franco ye un réxime fascista modeláu sobre, y en gran midida afincáu gracies a l’ayuda recibida de l’Alemaña Nazi d’Hitler y l’Italia Fascista de Mussolini.”
Esta definición, xunida a l’actuación del fascismu español, déxanos afirmar que’l franquismu foi un réxime criminal y que los sos crímenes permanecen impunes xudicialmente en virtú d’artificios llegales iguaos mientres la denominada “transición”. Nesti sen, ye contrariu dafechu al drechu internacional vixente que sigan a valir lleis como la mal llamada “llei d’amnistía”, que foi en realidá’l parapetu xurídicu de los responsables franquistes de la comisión de crímenes contra la humanidá.
Estos resolvimientos por tantu proclamen la illegalidá del réxime franquista, d’ende que se despintara la so esistencia nel momentu d’ellaborar la Constitución Española, o, dichu otra manera, España tendría qu’aplicar estos resolvimientos conforme al drechu internacional, siendo qu’amás-y cinca direutamente. ¿Qué se fixo? Despintales y llograr que se despintaren nel sistema de Naciones Xuníes. Si’l conteníu del Resolvimientu 39(I) de 12 d’avientu de 1946, s’aplicare, sedría una causa de nulidá de la constitución de 1978, porque esta Constitución desconoz estos resolvimientos, y, ello ye que declara llegal el franquismu.
En feches más recién, esti marcu d’impunidá viose complementáu cola llei de la memoria“ de 2007. Una llei contraria al drechu internacional, y a la xurisprudencia europea y que, poro, viola’l mesmu drechu internu español. El Congresu español dio’l vistu bonu, ente otros, a un artículu 3 que declara que los tribunales franquistes yeren illexítimos pero llegales; ési ye l’argumentu que s’usa pa nun declarar nules les lleis y otros actos xurídicos del franquismu que son contrarios amás a la Constitución actual. Son llegales pero illexítimos. La llexislación franquista nun s’anula y por tantu sigui en vixencia. Dende’l puntu de vista doctrinal ye una llei complementaria a la llei d’Amnistía y preslla lo que ye güei toa posibilidá de reconocencia xurídica de les víctimes.
Esti modelu llegal d’impunidá sancionáu pol Congresu tien dellos efeutos práuticos nel ámbetu llegal, pero principalmente, supunxo la indefensión y esclusión de les víctimes republicanes y la declaración de llegalidá del ordenamientu xurídicu franquista.
Estes cuestiones, que nun son menores, conformen una base d’illexitimidá sobre la que s’asitia’l réxime políticu actual. Esti problema de fondu nun puede superase con voluntarismos frívolos tales como querer mirar namás al futuru promisoriu”, nel que nos negamos a analizar el pasáu, menos inda cuando esi voluntarismu pretende desconocer que’l fascismu español ta somorguiáu y ye consecuencia de la hestoria europea.
Alemaña, Francia, etc anularon les lleis represores polo que nun esiste esa esceición española, esa “inseguridá xurídica” que dexa entender la democracia alemana, francesa, italiana ya inclusive la xaponesa resalvando la so rotura colos modelos llegales nacionalsocialistes, fascistes o imperialistes. Güei nun ye discutible afirmar que’l réxime fascista español cometió crímenes contra la población civil y que prauticó l’asesinatu, l’esterminiu, la tortura, el sometimientu a esclavitú, la deportación, la persecución por motivos políticos, raciales y relixosos, según l’encarcelamientu arbitrariu.
Sicasí, esta costatación empírica, ye refugada pola mayoría del parlamentu español y los tribunales, qu’intenten crear un ensin xacíu ya inmoral sistema doctrinal que dexe desfacese pa siempres la hestoria’l facismu español.
Tampoco la posibilidá d’una Comisión de la Verdá, en cualesquier de les sos formes, constitúi un mecanismu de rempuesta al problema de la impunidá, sobremanera si se tien en cuenta que les comisiones de la verdá nun pueden suplir la obligación que pesa sobre l’Estáu d’investigar, al traviés del so poder xudicial, los crímenes del franquismu.
El 18 de Payares de 2006, arriendes d’un informe espublizáu pola Sección Española d’Amnistía Internacional, la Presidenta de l’Asociación de Familiares y Amigos de Represaliaos de la II República pol Franquismu (AfarIIREP) redautaba una carta pública, na que dexaba nidio’l so refugu a la posibilidá d’una Comisión de la Verdá en cualesquier de les sos formes, y ello por trés cuestiones básiques:
a) Porque nun estáu de drechu lo que tien de primar ye’l drechu a la xusticia y esto nun se consigue al traviés d’una Comisión de la Verdá; b) Porque’l drechu internacional aplicable na xurisdicción europea obliga al cumplimientu de normes xurídiques qu’una Comisión de la Verdá nun puede garantizar;
c) Porque les Comisiones de la Verdá significaron na práutica la configuración de modelos d’impunidá.
Ye l’Estáu quien tien de garantizar el drechu a la xusticia, con toles implicaciones qu’ello supón, como ye l’accesu a los archivos de la represión, a les causes de la muerte nos rexistros civiles, al respetu de la normativa forense en materia d’esumaciones de restos humanos (y non de restos antropolóxicos, que ye como se trató fasta’l momentu a les víctimes d’execuciones xudiciales y estraxudiciales cometíes pol réxime franquista). L’Estáu nun puede tornar nin faer desdexación de les sos obligaciones en materia de drechu penal internacional. Ye induldable que nel casu del Reinu d’España la falta de responsabilidá penal de los autores de violaciones graves a los derechos humanos ye absoluta y, poro, el sistema d’impunidá diseñáu mientres la transición sigue incólume.
Y si dexamos que s’enllanten definitivamente los modelos d’impunidá, corremos el riesgu ciertu de perder les llibertaes que’l Pautu Internacional de Drechos Civiles y Políticos pretendió universalizar. Los modelos d’impunidá surden cola pretensión de resolver el dilema que representen la democracia, les llibertaes y l’espresión del usu racional de dambes, que son los derechos humanos. Carauteríza-yos la vanidá, que s’afigura en “la presunción de gobernar hasta más allá de la tumba…, na más faltante de toles tiraníes”, como tan bien respondiera Thomas Paine a Edmund Burke.
Y esto ye asina porque como dicía Jeremy Bentham “del poder de perdonar ensin llendes surde la impunidá de la delincuencia en toles sos formes, de la impunidá de la delincuencia en toles sos formes, la impunidá de toes la formes de maldá, de la impunidá de toles formes de maldá, la descomposición de los gobiernos, de la descomposición de los gobiernos la descomposición política de la sociedá”.
En plenu 2017, tres 40 años de democracia, l’estáu español sigui incumpliendo los trataos internacionales en materia de drechos humanos que robló y desoyendo los encamientos de los organismos internacionales, particularmente de les Naciones Xuníes. P’acabar cola impunidá namás hai una vía: una llei surdía del Parlamentu español, que condergue xurídicamente illegales el réxime franquista, les sos lleis represives y los sos tribunales, y que declare nules de plenu drechu les sos sentencies.
La única “utopía” realmente esistente, anicia n’esperar la Verdá, la Xusticia y la Reparación, dientro del actual sistema de poder esistente n’España, que tien por cabezaleru un Rei que nun xuró la Constitución Española de 1978, pa nun incurrir en perxuriu, yá que xuró ante los evanxelios la so llealtá incondicional a la dictadura del xeneral Franco, el 22 de xunetu de 1969.
Nun puede construyise’l futuru dando’l llombu al pasáu y restaurar la xusticia quier dicir tornar a les xeneraciones vinientes la llibertá, pa lo cual ye necesario obligar al mundu políticu a recuperar la so conesión coles formes de vida étiques onde la fraternidá y la solidaridá ocupen el so llugar. De lo contrario condergamos a les xeneraciones vinientes a vivir en plena soledá y nun espaciu ermu.
Les fueses comunes del franquismu.
Los desenterramientos que se fixeron y síguen faciéndose n’España dende’l puntu de vista del drechu ordinariu y dende’l puntu de vista del drechu internacional son illegales.
Si dicimos qu’hai una fuesa común en determináu llugar y damos en desenterrar los restos, producimos efeutos que nun tienen arreglu posible. El primeru, que tamos desenterrando fora de la llexislación forense y eso yá sedría un delitu. Ye bono d’entender, conforme a la llexislación forense a valir, si apaez un cadabre naide tien de tocalu dica qu’aporte un forense xudicial. Una fuesa ye esautamente igual, por más que pasaren 70 años.
Per otru llau, na Xunión Europea esiste un protocolu de desenterramientu nos casos de crímenes graves, esto ye, nun ye lo mesmo desenterrar a la víctima d’un asesinatu qu’una fuesa común. Hai una manera de desenterrar pa probar que foi un actu d’esterminiu. Esta posibilidá probatoria esaníciase cuando lo que se realiza ye un desenterramientu illegal.
La carrera” d’esumaciones illegales n’España, probablemente tien l’oxetivu en destruyir aquelles que podíen constituyir prueba fehaciente de los actos d’esterminiu sistemáticos, que son los que configuren el tipu penal de crímenes contra la humanidá, y, que poro, nun prescribiríen. Cuando falamos de fueses, tamos falando de crímenes, en concretu de los más graves crímenes qu’un estáu puede cometer en cualquier sociedá o país, esto ye, de crímenes de guerra, contra la paz y de llesa humanidá.
Según la llei procesal española (Lecrim.), la so investigación y persecución correspuenden a los xulgaos d’instrucción y tribunales penales españoles. La esumación ya identificación de víctimes, siguiendo lo dispuesto pol Autu del Tribunal Supremu de 28 de marzu de 2012 y talo como resume nel so comunicáu oficial sobre’l mesmu’l Conseyu Xeneral del Poder Xudicial, correspuende a los Xulgaos d’istrucción de los llugares onde asocedieron presuntamente los fechos.
El Conseyu Xeneral del Poder Xudicial lliteralmente, esclaria que “La Sala Segunda del Tribunal Supremu, por aciu Autu motiváu 29 de marzu alcordó que la competencia sobre les denominaes ‘fueses del franquismu’, y, por tanto, sobre la tramitación de les estremaes dilixencies abiertes pa esclariar la llocalización ya identificación de los restos mortales de persones sumíes mientres los años de la Guerra Civil y la posguerra darréu en distintos puntos de la xeografía española, correspuende a los Xulgaos d’istrucción d’aquellos llugares onde supuestamente asocedieron los fechos…”. Ye mas afirma que considera que puede encamentase del xuez d’instrucción competente (artículu 14.2 de la Llei d’Enxuiciamientu Criminal) la práutica de les dilixencies empobinaes a datar aquelles aiciones criminales y a la identificación de los afeutaos pa proceder consecuentemente en drechu.
Con esti Autu resolvióse’l problema de les posiciones contraries a drechu esistentes hasta’l momentu. Lo grave ye que n’España hubo, y hai, cientos de desenterramientos realizaos al marxe de la llei, negando’l drechu a la xusticia a les víctimes y tratándoles como meros restos arqueolóxicos y non como suxetos de plenu drechu.
Paez entós nidio que les esumaciones y l’identificación de víctimes del franquismu soterraes en fueses comunes, tienen de realizase siguiendo procedimientos acordes col drechu internacional de drechos humanos, esto ye, tienen de realizase nel marcu d’un procedimientu xudicial válidu, con toles garantíes forenses y del debíu procesu. L’alministración llocal, central o autonómica, les asociaciones, etc van poder ausiliar a l’alministración xudicial, pero enxamás suplantala nun estáu de drechu.
Entós, ¿por qué les víctimes del franquismu han de tener un tratamientu, distintu a cualesquier otra persona? ¿Por qué se yos vuelve penalizar, negándo-yos los drechos que-yos asisten como víctimes d’execuciones estraxudiciales, asesinatos, deportación, encarcelamientu, tortures y un llargu etcétera, y un xuiciu xustu coles debíes garantíes? ¿Por qué se-yos niega’l so drechu a que los crímenes de que son víctimes seyan investigaos xudicialmente, y nel so casu, les sos victimarios seyan enxuiciaos y condergaos polos crímenes cometíos?.
El principiu del xuez natural del llugar de los fechos ye un principiu básicu de los drechos y llibertaes civiles reconocíu dende la Revolución Francesa, en contraposición a drechos absolutistes d’escoyer xueces y afitar xurisdicciones d’esceición que foi convertíu por Carl Schmitt nel modernu “drechu d’esceición”, base del drechu nacionalsocialista y del franquista y que resurdió coles mesmes como base de la llexislación post atentaos de les torres ximielgues, siendo’l so exemplu más representativu’l de los presos de Guantánamo.
Lo resuelto por esi Autu del Tribunal Supremu tendría de poner fin a los desenterramientos illegales, desenterramientos que lleven a la destrucción de prebes de los crímenes cometíos pol Franquismu. Esti tipu d’actividaes fueron llargamente espublizaes pelos medios y cuntaron amás cola mayor parte del financiamientu que, dende Moncloa, se distribuye pa estos fines “memorialísticos”, de forma que los desenterramientos illegales convertiéronse, como yá diximos, na exa central que dexó’l tapecimientu de la cuestión de fondu, esto ye, la reconocencia xurídica de les víctimes.
De los fundamentos del Autu de 28 de marzu de 2012, que resuelve la cuestión de la xurisdicción, son de destacar especialmente los siguientes:
“La Declaración sobre los principios fundamentales de xusticia pa les víctimes de delitu y del abusu de poder, de 29 de payares de 1985, de l’Asamblea Xeneral de la ONU defende l’establecimientu y reforzamientu, cuando fuera necesario, de mecanismos xudiciales y alministrativos que dexen a les víctimes llograr reparación por aciu procedimientos oficiales o oficiosos que seyan espeditos, xustos, poco costosos y acesibles”.
“Nel mesmu sen, con mayor precisión y detalle, el Resolvimientu de 2000, de la Comisión de Drechos Humanos de la ONU y sobremanera, el Resolvimientu de 2006, aprebada pola Asamblea Xeneral de la ONU, relativa a Principios y direutrices básicos sobre’l drechu de les víctimes de violaciones manifiestes de les normes internacionales de drechos humanos y de violaciones graves del drechu internacional humanitaria a interponer recursos y llograr arreglos.”
Dambes normes son previes a la denomada “Llei de la Memoria” y fueron a costa fecha ignoraes polos pás” d’esta esa Llei, y por numberosos miembros de la xudicatura, fiscalía y abogacía, constituyendo per se la demostración oxetiva de la nueva doctrina d’impunidá ya inxusticia qu’impera n’España.
La resistencia armada antifranquista: Los guerrilleros.
En plenu sieglu XXI la vergoñosa realidá actual nel estáu español, ye qu’oficialmente a los guerrilleros y guerrilleres sigue acomuñándose-y a la condición de bandoleros y terroristes (calificación por tantu non amnistiable nin siquier pola preconstitucional llei d’Amnistía), yá que les sos sentencies condergatories franquistes siguen tando vixentes. Mientres años, y ante tolos gobiernos democráticos, gobernara quien gobernara, FAMYR, otres asociaciones y dellos diputaos de grupos parlamentarios d’esquierdes, reclamó la so reconocencia xurídica.
El parlamentu español refugó toles Proposiciones de llei, enmiendes y entrugues parlamentaries, presentaes por que la so equiparación a tolos niveles colos antiguos miembros de les Fuerces Armaes oficiales republicanes fuere una realidá. Ye una situación vergoñante, incomprensible, inaudita y asurda n’otres democracies que carecieron pasaos fascistes, nes que se reconoz y honra a la resistencia.
Los Archivos
La desclasificación y catalogación de tolos archivos diplomáticos y de servicios secretos fasta la introdución del réxime democráticu ye tamién una xera pindia. N’España los archivos diplomáticos son secretos dende la Guerra de Cuba de 1898. L’acesu ta acutáu a hestoriadores y en determinaes condiciones. Nengún hestoriador/a tien acesu completu a los archivos, sinón que, por casu nel casu del Ministeriu d’Asuntos Esteriores, asítiase-yos nuna sala a la que los lleven determinaos documentos que solicitaron. ¿Cómo ye esto posible? Pola cenciella razón de que nun hai un catálogu de los fondos realizáu con criterios científicos, lo que, obviamente, torga conocer tola actuación de Franco y del réxime franquista.
Tamién en rellación con esti problema de los archivos, ye necesario faer un inventariu de los archivos penales, xudiciales, carcelarios, militares, d’intelixencia, municipales, etc., y acometer la so catalogación y reorganización con sistemes teunolóxicos actuales, pero aplicando parámetros que sirvan a la defensa de los drechos humanos, pues tamos falando de los archivos de la represión, y, coles mesmes, que seyan d’utilidá al sistema xudicial internu y foriatu. Esto quier dicir que non solo hai que catalogar y archivar, sinón qu’hai que dexar llistos estos archivos pa que puean ser usaos xudicialmente polos xueces o polos abogaos de les víctimes.
Esto ye una obligación que recái sobre los archivos nacionales. Tratándose d’archivos qu’afeuten a los drechos civiles, l’Estáu ta obligáu non yá a llevalos talo como se lleven clásicamente, sinón que se tien de siguir una catalogación por descripción que dexe l’usu en drechu penal internacional y drechu penal ordinariu internu. Ta nidio qu’esto nun se fixo tampoco nin se va a faer lo que ye güei.
Sumíos/Desapaiciones forzoses
Sobre l’usu del términu “desapaiciones forzoses” que de manera comenenciuda ta introduciéndose na terminoloxía de la Memoria histórica democrática n’España, convendría señalar que la desapaición forzada de persones ye un tipu del drechu penal internacional non vixente mientres la Guerra Civil y la Dictadura franquista, qu’esiste namás dende 2006 y qu’entró a valir en 2010, colo que falar de deteníos-sumíos/as ye un elementu más que tien por consecuencia sustraer a la víctimes del marcu de la xusticia y, poro, nun poder falar de reconocencia xurídica.
Esti matiz paeznos de cimera importancia si lo que se quier ye una recuperación de los valores democráticos que, por desgracia pa la hestoria d’España, nel periodu que va dende la Revolución francesa de 1789 y dica la nuesa Costitución de 1978, namás esistieron nel curtiu intervalu en que tuvo a valir la Costitución de la II República.
Ello dexa tamién falar con responsabilidá y seriedá de los tipos de delitos cometíos pol réxime franquista. El plan d’esterminiu de la oposición política puestu en marcha por aciu la fixación de blancos y les instrucciones al aparatu de xusticia y les fuerces del orde, ye lo que desgraciadamente nos dexa afirmar güei que se cometieron crímenes contra la humanidá, al perpetase actos de tortura, encarcelamientu arbitrariu, detención illegal, asesinatu, esterminiu, esclavitú, deportación, persecución por motivos políticos, etc, de manera sistemática y a gran escala.
Estes categoríes penales que vienen del drechu internacional, pero que son d’obligada aplicación pol drechu internu y que los nuesos tribunales yá aplicaron a crímenes cometíos mientres la Dictadura militar arxentina, tán claramente desplicaes nel conocíu como informe Nizkor tituláu “La cuestión de la impunidá n’España y los crímenes franquistes”.
Trátase de crímenes imprescriptibles y non amnistiables. Poro ye importante caltener toles prebes de los mesmos, tanto documentales, como testimoniales y materiales, yá que, la recuperación de lo acaecío pasa non solamente por honorar la memoria de les víctimes, sinón tamién por fae-yos xusticia y, dende los poderes públicos, facilitar l’acesu a la xusticia y al debíu procesu, independiente ya imparcial, de les víctimes y los familiares de les víctimes del franquismu. La naturaleza de los crímenes cometíos ta ende, independientemente de si los nuesos tribunales lo reconocen o prefieren considerar como válides lleis d’impunidá, como la Llei d’Amnistía de 1977, denunciaes por Naciones Xuníes y que son contraries al debíu procesu a y a los drechos de les víctimes.
Como crime internacional, la naturaleza del crime contra la humanidá y les condiciones de la so responsabilidá son afitaes pol drechu internacional con independencia de lo que puea afitase nel drechu internu de los Estaos. Esto significa que’l fechu de que’l drechu internu del Estáu nun imponga pena dalguna por un actu que constitúi un crime de llesa humanidá, nun esime de responsabilidá en drechu internacional a quien lu cometiera.
ANEXU Propuesta de programa contra la impunidá y de fortalecimientu democráticu
Ratificación de la Convención sobre la imprescriptibilidá de los crímenes de guerra y de los crímenes de llesa humanidá“.
Declarar por Llei la nulidá de toles aiciones llegales del réxime franquista, faciendo mención espresa a los Resolvimientos de les Naciones Xuníes adoutaes por unanimidá pola Asamblea Xeneral de la ONU el 9 de febreru de 1946 [Res. 32(I)] y el 12 d’avientu de 1946 [Res. 39(I)], y al so calter criminal según les normes de drechu internacional.
Declarar la nulidá de tolos xuicios penales y militares por arbitrarios ya illegales, adoutando les midíes afayaices pal resarcimientu proporcional y actualizáu de les víctimes, según la recostrución de los archivos penales y xudiciales afeutaos.
Ellaborar una llei d’esumaciones ya identificación de víctimes que tenga en cuenta los tipos de delitos, la necesaria conocencia de la verdá y qu’afite los procedimientos acordes col drechu internacional de drechos humanos.
Dicha llei tien de tener en cuenta amás los distintos tipos d’enterramientos clandestinos, oficiales, etc. y resolver el casu de les fueses comunes productu del plan d’esterminiu, de los enterramientos illegales y de les fueses comunes de les tropes regulares nos frentes de batalla.
Ellaboración d’un Manual d’Antropoloxía forense afechu a les normes internacionales de drechos humanos, crímenes de guerra y a la situación hestórica de la II República y del réxime franquista, que dexe ordenar los desenterramientos n’orde a la istrución penal correspondiente en función del tipu de delitos y les víctimes, seyan éstes civiles o soldaos regulares nos frentes de batalla.
Normalización llexislativa de los bancos de datos d’ADN pa la identificación de víctimes, procediendo al rexistru xudicial de les amueses de los restos de les víctimes, según les de los familiares que lo soliciten, y creando los parámetros de reconocencia que surdan de la esperiencia antropolóxicu forense y sociolóxica.
Llei de reconocencia de los campos de concentración y de trabayos forzaos, y recostrución de los procesos siguíos nos mesmos y de les víctimes.
Desclasificación y catalogación de tolos archivos diplomáticos, militares y d’intelixencia fasta la istauración del réxime democráticu.
Inventariu, catalogación y reorganización, con medios afayaizos a la teunoloxía actual, de los archivos penales, xudiciales, carcelarios, militares, d’intelixencia, municipales, etc., a nivel de toles alministraciones, afaciéndolos a les normes del drechu, a la verdá y a la xusticia de les víctimes.
Tien de reconocese’l llibre acesu y l’obligación de collaboración xudicial de los responsables de dichos archivos coles víctimes y los sos familiares, organizaciones de víctimes, organizaciones de drechos humanos y cola xusticia nacional o d’otros países.
Recostrución de les llistes de víctimes españoles en terceros países de resultes del réxime franquista, incluyendo especialmente a los denomaos “neños y neñes de la guerra”, y solicitando, si fuera necesario, la collaboración internacional, especialmente nel ámbetu européu, pa lo que se va cuntar coles organizaciones d’esiliaos o d’organizaciones estranxeres que collaboraren col esiliu republicanu. Va dar na regularización xurídica de los problemes de nacionalidá española derivaos del esiliu y de los que son consecuencia de la iscripción d’españoles en rexistros d’autoridaes llexítimes de la II República, otorgando’l caltenimientu de la doble nacionalidá de los esiliaos y de los sos descendientes en tolos casos.
Recostrución de les llistes de víctimes y represaliaos dende’l llevantamientu franquista, de forma llegalmente válida, otorgando la reconocencia xurídica válida y teniendo especial curiáu colos menores, güérfanos y muyeres.
Adecuación de les normes de los rexistros civiles a efeutos de la correcha determinación de les causes de muerte.
Afitar un inventariu de los bienes escalaos, embargaos o espoliaos por motivos políticos, relixosos y de represalies.
Afitar una llexislación que dexe la recuperación ya indemnización a cargu del estáu, o de los responsables patrimoniales si esistieren, de los bienes espoliaos a persones físiques o llegales por motivos políticos, relixosos o de represalies de cualesquier tipu.
Llexislación de reconocencia de tolos y les militares que sirvieron llealmente a la II República, restableciendo la so condición hestórica y afaciendo los sos méritos reglamentarios a tolos efeutos.
Llexislación de reconocencia de tolos y les militares y fuercies irregulares d’orixe español que collaboraron colos países aliaos na resistencia contra los países de la Exa y contra’l réxime franquista, oldeándolos a la reconocencia xurídica, militar y social que se siguió en países como Francia.
Recostrución de los mandos de toles organizaciones franquistes nel interior y l’esterior d’España, pa facilitar el drechu a la verdá y la conocencia de los perpetraores de los crímenes contra la humanidá.
Fixación d’un sistema de resarcimientu económicu actualizáu, en términos actuariales y que se correspuenda cola realidá económico y social española, a tou tipu de víctimes entá vives, heriedos y les sos families, con adoción de les midíes necesaries pa la reconocencia social y cultural, pa lo que se va dar na llocalización, catalogación y declaración como padrimoniu hestóricu de los llugares de memoria de la llucha en defensa de la República y de la represión franquista.
