El Mazucu: Un atentáu facista que va pasar, de nuevu, al olvidu.

Juan UHP

Ye la 3 vegada que’l monolitu qu’homenaxea a los soldaos antifacistes republicanos que combatieron contra’l facismu nel Altu de la Tornería n’El Mazucu (Llanes) sufrió un atentáu facista. Atentáu que vien coincidir con una esguilada d’agresiones  contra esti tipu de monumentos n’Asturies (Casu, Salines o Cabacheros) ante la total pasividá de les autoridaes.

Un atentáu más que va pasar de nuevu al escaezu, fiel reflexu d’una sociedá indiferente a la puxanza del fascismu, fiel reflexu d’una sociedá española construyida pol réxime de la transición indiferente a les víctimes del franquismu.

Nes dos ocasiones anteriores en que’l citáu monolitu sufrió los atentaos facistes y magar los claros nicios esistentes sobre l’autoría del mesmu, nun hubo nenguna actuación de les autoridaes competentes y ello xúnese al manifiestu incumplimientu de los distintos Gobiernos pa cumplir l’actual y aberrante Llei de Memoria Historica, qu’entá dexa la esistencia de monumentos, cais y numberosa simboloxía facista. Situación esta qu’obligó a FAMYR a entamar una campaña pa retiralos, baxo’l epígrafe «Madreñazu al franquismu». Pa mas inri, n’el mesmu Altu de la Tornería esiste un monolitu qu’homenaxea a la «Legion  Condor» nazi, que probablemente representa l’únicu monumentu al nazismu esistente n’Europa, situación insólita pa cualquier democracia Europea, pero habitual pal estáu postfranquista nel que vivimos.

Toes estes circunstancies ponen de nuevu de manifiestu’l modelu español d’impunidá, nel que les víctimes republicanes nun tienen derechu dalgunu frente a la llegalidá que surde de la Constitución de 1978. L’actual estáu de coses nun ye más que la consecuencia de la falta de responsabilidá ética, moral y llegal de los grupos políticos parllamentarios que sofitaron la denominada «Llei de la Memoria Histórica», que nun ufierta solución llexislativa a los principales aspeutos de la cuestión de les víctimes del franquismu, dexando na indefensión más absoluta a les víctimes y los sos familiares y, entá más, pretende alloñar de la Hestoria común europea, y, especialmente, de les soluciones que s’adoptaron na materia nos países que sufrieron réximenes facistes o nacionalsocialistes.

  Debemos faer una fonda reflexón sobre les consecuencies d’esti tipu d’actos qu’aumenten el déficit democráticu pindiu dende la denominada transición y que tienen de resultes el que los ciudadanos lleguen a la conclusión de que les llibertaes civiles, los principios democráticos y los drechos humanos son en realidá parte d’una democracia baxo tutela» per parte d’un réxime illegal como’l franquismu. Refugamos la Constitución de la Monarquía por entender que namái garantiza los intereses económicos de la oligarquía, mientres que nun garantiza de manera efectiva los drechos de les clases trabayadores a la vivienda, al trabayu o a una vida digna.

Por ello, dende la FEDERACIÓN ASTURIANA MEMORIA Y REPUBLICA (FAMyR):

– Reiterámonos nel plan d’acción aprobáu poles asociaciones memorialistas y de derechos humanos conocíu como Informe Nizkor, deliberadamente ignoráu pol estáu español.

– Esiximos a les fuerces polítiques democrátiques un claru pronunciamento a favor de les victimas del franquismu y del nacionalsocialismu, según la ellaboración de polítiques actives destinaes a la so reconocencia.

– Demandamos qu’estes fuerces polítiques democrátiques amuesen el so esplícitu refugu y non reconocencia a l’actual hereditaria xefatura del estáu ya impuesta pola dictadura franquista. La monarquía nun puede aceptase nin como propuesta. La esclavitú non puede almitise democráticamente. La monarquía tampoco. Refugamos tou intentu de Reforma parcial o total de la Monarquía y la so Constitución, tal que güei pretenden llevar a cabu los partíos, organizaciones y medios de comunicación del Réxime.

– Declaramos el nuesu firme compromisu de superar l’actual Monarquía y de la so Constitución per mediu de la llucha y la movilización de los pueblos del estáu español. Esiximos que se reconoza el drechu d’autoderteminación que permita exercer la soberanía popular. Reivindicamos la forma d’estáu republicana como la única compatible con una verdadera democracia política, social y económica que permita sentar les bases del fin del capitalismu xabaz y el patriarcau.

Pola xusticia social, el feminismu y la autodeterminación de los pueblos.

Ensin República, nun hai democracia