La Federación Memoria y República refuga que se faiga un mapa PUBLICU de foses comunes n’Asturies
La Federación Asturiana Memoria y República (FAMYR) refugó la propuesta de Magarita Semprano, responsable de la Oficina pa les Víctimes de la Guerra Civil y de la Dictadura del Ministerio de Xusticia, de facer un mapa públicu de les foses comunes del país. El colectivu recuerda que les foses comunes del franquismu «son pruebes de crímenes contra la humanidá y como tales han ser protexíes poles instancies xudiciales pertinentes. Nun son bienes d’interés cultural nin nenguna otra figura simbólica».
Ún de los argumentos que dio la FAMYR pa xustificar la so oposición a esta midida ye que la publicación d’esi mapa «va suponer un riesgu grave na conservación de les foses como pruebes xudiciales». Amás, la Federación recuerda que pue haber peligru de qu’esos espacios sufran «atentaos fascistes».
Otra manera, la Federación, formada por cinco asociaciones asturianes, púnxose a disposición de les autoridaes xudiciales p’apurri-yos tola información disponible en materia de crímenes del franquismu. Al empar, FAMYR volvió a facer la so petición de que se convoque la Comisión Asturiana de la Memoria.
Igualmente, la Federación denuncia que l’Estáu español «sigue ensin cumplir les sos obligaciones derivaes del derechu penal internacional pa coles víctimes del franquismu». Amás, FAMYR ye mui crítica cola Llei de la Memoria Histórica aprobada pol Congresu español al valorar qu’ésta «considera llegales les lleis franquistes, colo que vieno a agravar la indefensión de les víctimes y a fortalecer el modelu español d’impunidá».
Les crítiques tamién se dirixeron a les solicitúes d’estradicción de nazis a España que fixo l’Audiencia Nacional: «Ye incomprensible pa cualquier ciudadanu que la xusticia española pueda xulgar a los responsables estranxeros del esterminiu, asesinatu y otros delitos graves contra nacionales españoles nel estranxeru baxo’l tipu penal de Crímenes contra la Humanidá y, sicasí, los mesmos delitos cometíos por españoles contra nacionales españoles en territoriu español permanezan fuera de la xurisdicción y competencia de la xusticia».
