Belarmino y Andecha

 

LEO con atención l’artículu d’opinión de Rafael Fernández Tomás, fiu del primer presidente del Principáu y nietu del presidente del Conseyu Soberanu d’Asturies y Lleón. N’él, Rafael da les gracies a Andecha Astur por organizar un homenaxe al so güelu, a la vez que recrimina al so partíu l’enfotu n’escaecer lo que significaron Belarmino Tomás y la so xeneración.

Bien ta un actu nesti sen, y atalanto que meyor tovía lo estaría si fuere entamáu por tola izquierda asturiana, que debería compartir, en mayor o menor midida hestórica, esti plantegamientu. Y si nun fuere compartíu, lo menos malo y lo más eficaz sedría tratar de convencelos con métodos democráticos, y con diálogu y argumentaciones hestóriques ya ideolóxiques bien fundamentaes, con más paciencia y menos descalificaciones. Esti ye’l camín de la unidá, l’únicu posible pa llegar a tener una organización política amplia, basada na confianza y na collaboración, con pesu políticu y social n’Asturies, que sea respetada y sofitada pol conxuntu de los asturianos. Eso desixe arrenunciar a los ‘chiringuitos’ particulares, a los reinos de taifas montaos como ‘referentes’ pola vanidá de los sos cabezaleros, a los caprichos de los que sólo almiten una Asturies a la so midida. Pero, ¿qué voi dicir que nun tea dicho ?

A falta d’esti homenaxe global hacia Belarmino Tomás, lo menos malo sedrá que lu promueva dalguna organización. Agora bien, Rafael Fernández Tomás nun debió ser bien informáu, porque na so carta da les gracies a Andecha Astur como organizadora del actu, y esto último ye radicalmente falso. Esplícome.

La minoría de persones qu’apaecen actuando en nome d’Andecha Astur dende fai tres años tán faciéndolo de forma fraudulenta y ellos sábenlo, siendo plenamente conscientes de los sos conceyos fueron anulaos o suspendios polos xueces en cinco ocasiones, al intentar una y otra vez facese col control esclusivu del partíu de forma ilexítima. Yá nel mes de mayu, el xuez dexó nidio qu’estes persones nun formen parte de la dirección, y por ello ordenó-yos retirar la candidatura que presentaron en nome d’Andecha Astur a les eleiciones europees, incurriendo nel delitu de desobediencia reiterada al xuez al negase a ello, lo que camiento que tendrá consecuencies penales, a través de les actuaciones que ya tán en marcha. Por embargu, anecien nel so determin de siguir per esti camin, incurriendo cada poco en nuevos presuntos delitos coles sos nueves actuaciones en nome d’Andecha Astur, desafiando una y otra vez los autos y sentencies xudiciales, y lo que ye peor, semando la discordia permanente cola mayoría de militantes. Al mesmo tiempu, piden ‘xunidá d’aición’ a les otres organizaciones. Ensin comentarios.

L’ actu-homenaxe a Belarmino Tomás quedó mancháu y emporcáu por un posible delitu, a costa de la bona voluntá del so nietu, y a costa d’intentar separtar d’Andecha Astur a la mayoría de los sos militantes, que no compartimos estos métodos y que, equivocaos o non, creemos na unidá de la izquierda nacionalista asturiana y seguimos naguando por ella como oxetivu necesariu, pero que nun vamos consentir que se nos espulse de la nuestra propia casa. ¿Dalguién lo permitiría?

Rafael Fernández Tomás tien tol derechu del mundu a quexase del so partíu, pero debe tar más atentu cuando lu conviden a homenaxear al so güelu, porque’l resultáu pue ser la sema de más odiu, dixebra y desconfianza na izquierda nacionalista, contribuyendo a entafarrar la memoria histórica d’Asturies y del Conseyu Soberanu, y de pasu a fortalecer al so propiu partíu, al que con razón tanto critica. Digo too esto a títulu personal, y espero que se m’entienda el mio estáu d’ánimu dempués de comprobar que durante los tres caberos años, equí sólo hai interés en que les coses sigan como taben. Un buen panorama pa qu’en 2011, 600.000 asturianos vuelvan a votar a los de siempres.

http://www.elcomerciodigital.com/gijon/20090903/opinionarticulos/belarmino-andecha-20090903.html