LARRABETZU: HOMENAXE A LOS MILICIANOS ASTURIANOS Y A LA SOLIDARIDÁ ANTIFASCISTA D’IDA Y REVOLVÍA
20/05/2013 por FAMYR
LARRABETZU: HOMENAXE A LOS MILICIANOS ASTURIANOS Y A LA SOLIDARIDÁ ANTIFASCISTA D’IDA Y REVOLVÍA
Demientres el mes de Xunu de 1937, fai agora 76 años, nel llugar situáu ente Basaugne y la casa Bolumburu, nel conceyu de Larrabetzu, un garrapiellu de milicianos asturianos defendíen la rodlada d’esti pueblu. Tras furar el frente les tropes franquistes
y entamar un ataque sobre esta zona, un númberu indetermináu d’estos milicianos foron sorprendíos y muertos nesti llugar, siendo dempués empozaos usando pa ello una o de les trincheres qu’equí había. Esti fechu como tantos d’esa dómina tuvo escondíu n’alcordanza de les poques presones que lu conocieron por tomar parte nos trabayos del empozamientu o ser familiares d’aquelles que lo ficieron, siendo desconocío pa la mayoría de los vecinos d’esti pueblu.
Sicasí l’añu pasáu, una de les poques persones conocedores d’esti fechu qu’aínda vivíen, amalecíu d’un mal mui grave y nun tris de finar, tresmitió’l secretu a ún de los sos sobrinos y esti pel so lláu, dio a conocer el mismu a otros vecinos sensibilizaos como él, cola defensa de la memoria hestórica democrática y antifacista, decidiendo toós ellos, ponese en marcha pa intentar saber dalguna mena quienes yeren aquellos milicianos asturianos y da-ylo a conocer a los sos familiares. Asimismo axustaron facer un reconocimientu públicu y un homenaxe a los mismos al cumplise el 75 aniversariu d’aquel sucesu, actu que tuvo llugar el Xunu pasáu y nel cual dende Ahaztuak 1936-1977 tomemos parte.
Agora un añu dempués y cuando va cumplise’l 76 aniversariu d’aquellos fechos Ahaztuak 1936-1977 y cola collaboración
de la plataforma asturiana «Larrabetzu 1937-2013» y de la organización memorialista asturiana FAMYR (Federación Asturiana Memoria y República) entamos una serie d’actos que tendrán llugar los díes 21, 22 y 23 del prósimu mes de Xunu y que tendrán como exa remembrar y emponderar la llucha y la solidaridá antifacista de los milicianos asturianos cayíos nesti llugar o notros
como Peña Lemona, Saibigain, Sollube, Artxanda, Irún, … y por estensión la de tantos milicianos d’otros llugares cayíos
tamién en suelu vascu sorrayando amás la solidaridá internacionalista y antifacista como algo recíproco, d’ida y vuelta, poro
esti homenaxe falará de los ideales y la solidaridá antifacista d’estos home qu’aquí morrieron pero tamién de la misma solidaridá
e ideales de tantos vascos como morriendo combatiendo al facismo en tierres d’Asturies: del comandante Saseta, de los gudaris y milicianos que morrieron y tan enterraos n’Areces, na batalla del Mazucu, en Grao… o en tantos otros sitios.
Con esti envís diseñemos un programa d’actividaes qu’entama el vienres día 21 n’Anguleri Kultur Etxea con una conferencia
que llevará por títulu: «SAngre de Octubre: los batallones asturianos en Euskadi 1937-37» a cargu de Julen Lezamiz de l’asociación
«Sancho de Beurko».
El sábadu 22 será’l día grande d’esta iniciativa y emprimará con un Actu Institucional a les 12:00 h. nel Ayuntamientu de Larrabetzu
nel que nombrarán «ciudadanos d’honor» a los milicianos enterraos en Bolumburu. Tres d’ello empobinaremos pal llugar del enterramientu y procederemos a la inauguración d’un monolitu n’alcordanza de los cayíos y darréu fadremos un Actu de Memoria. Dempués a les 14:30 hores fadremos una Comida Popular y pela tarde tendrá llugar un conciertu con Salvador Amor y Gabriel Ortega.
Los actos programaos finarán el domingo día 23 con una visita guiada al trechu del «Cinturón de Hierro», que trescurre pelos montes de Larrabetzu.
Entendemos que l’oxetivu de los actos programaos a los que vos convidamos a participar queda bien espeyáu nel sentíu bertso que Etxahun Lekue, conocíu bertsolari de Larrabetzu cantaba l’añu pasáu nel homenax fechu en Bolumburu:
Euskal Herritik asturiarrak
omentzeak zer lekarken
konturatzeko emon beharko
gendukez zenbait azalpen.
Euskaldunekaz gura izan eben
Francoren kolpea eten.
Elkartasuna joan etorriko
ariketa da azken baten:
Nozenoz jaso gura dauanak
jakin behar dau ematen.
(Pa remembrar a estos asturianos
dende Euskal Herria/ ye necesario que vos
digamos porque taben equí/ taben porque queríen
xunto colos euskaldunes parar el güelpe de Franco/
La solidaridá ye una aición d’ida y revolvía: el que quier recibila tamién
tien que saber dala)
AHAZTUAK 1936-1937
FAMYR
